«Ұрпаққа үлгі – әр ісің!»
(Қарттар күні мен Ұстаздар күні мерекесі аясында ардагер ұстаздармен кездесу кешінің сценарийі)
ӘН: Музыкалық аспапты ансамбльдің орындауында «Ұстазым» әні.
Жүргізуші: Құрметті ардагерлер, ардақты ұстаздар!
Қазан айының алғашқы мерекелері қарттар және ұстаздар мерекесі тоғысқан күнімен құттықтаймыз!!!
Аппақ шашың күн сайын қылаңдаған,
Зейнет емес бейнеттен арылмаған.
Тәңірімдей табынып өтем мәңгі,
Қариялар өзіңді ел сыйлаған.
Ел мүддесін бәрінен биік қоятын, өзінен кейінгі ізіне ерген інілеріне ізеттілігін аямайтын, ізінен ерген ұрпағына ұлылығын ұялатып, бір қауымға бас-көз бола білген ардагерлеріміздің орны ерекше.
Мектеп мұғалімдері мен ардагер ұстаздардың қатысуымен «Ұрпаққа үлгі – әр ісің!» тақырыбындағы ардагер-ұстаздармен, еңбек ардагерлері және ұстаздар әулетімен сыр-сұхбат, салтанатты мерекелік кездесу шарасына қош келдіңіздер!
Жүргізуші:
Ісім оңсын десеңіз,
Сол істің маманы болыңыз.
Даңқым шықсын десеңіз,
Көпшіліктің адамы болыңыз, - деп Әл-Фараби атамыз айтқандай, өз істерінің маманы бола білген бүгінгі шараның қонақтары - ардагер ұстаздар.
Білім беру саласындағы ұзақ жылғы жемісті еңбектері және жас ұрпақты оқыту мен тәрбиелеуде біраз жетістіктерге жеткен аяулы ардагер ұстаздарымызға қошемет көрсетіп қоялық.
Ұстаз! Қандай қасиетті сөз! Әр адамның жүрегіне ерекше жылулық нұрын себетін аяулы тұлға бейнесімен өзектес ұғым. Барша ұстаздарымызды кәсіби мерекемізбен шын жүректен құттықтаймыз! Еңбектеріңізге адалдық, отбастарыңызға бақыт, елімізге тыныштық тілейміз!
Бүгінгі мерекелік шараны ашып, мерекелік жылы лебізін білдіру үшін сөз мектеп директоры Садиров Адилхан Ақбайұлына беріледі.
Жүргізуші:
Ардагерлер ардақты асыл жандар
Шәкіртімен мерейі тасығандар
Білімнің сәулесі мол нұр көшінде
Шуақ боп, шапағат боп шашылғандар
Ортамызда қадірменді қарттар бар,
Ащы өмірдің тауқыметін тартқандар.
Арқасында нардың жүгін артқандар.
Омырауға қос-қос орден таққандар.
Еңбек ардагерлерін құттықтау үшін ауылдық ардагерлер кеңесінің төрағасы Садуов Болат ағайға сөз беріледі.
(ЕҢБЕК АРДАГЕРЛЕРІ ҚҰТТЫҚТАЛАДЫ)
Жүргізуші:
ӘН: Бастауыш сынып мұғалімдері Достанова Рая мен Достыбаева Айсамалдың орындауында, халық әні «Гүл-гүл жайна». Қабыл алыңыздар!
Жүргізуші:
Зерделеп өнегені бала жастан,
Ұстаз болып жаралған әуел бастан.
Жылы жүрек, жүзінде мейірім – шуақ,
Ғибраты ұстаз жолы – ұлы дастан
Ұрпақпен өмір жолы жалғанады,
Көңілді күндер тусын алдан әлі
Ән-шашу әсем әуен, түрлі өнер,
Бүгінгі күн сіздерге арналады.
Біздің ауылымызда, ұжымымызда блім саласында ұрпақтар сабақтастығын үзбей еңбек етіп келе жатқан әулеттер бар. Міне, сондай әулеттердің бірі «Садуақасовтар әулеті» мен «Қожабаевтар әулеті».
Ендеше, осы әулеттерге мерекелік жылы лебізін білдіріп, құттықтау үшін сөз мектеп директоры Садиров Адилхан Ақбайұлына беріледі.
(ҰСТАЗДАР ДИНАСТИЯСЫ МАРАПАТТАЛАДЫ)
Жүргізуші:
ӘН: Бастауыш сынып мұғалімі Жұмахметова Галияның орындауындағы халық әні «Бүлдірген» әнін қабыл алыңыздар!
Жүргізуші:
Бүгінгі «Сыр сұхбат» кездесуінің кейіпкерлері, қонақтарымыз — шәкірттердің шуақ шашқан күніндей ардақты жан, мұғалім атты қиындығы мен қызығы қатар жүретін мамандықты таңдағаннан бастап, сан мыңдаған жас ұрпақтың болашақ пен жалғастырар алтын көпіріне айналған ардагер ұстаздарымыз бізбен бірге.
Ендеше, ұзақ жылдар білім саласында еңбек етіп, өскелең ұрпақты білім нәрімен сусындатқан ардагер ұстаздардың өнегелі өмір жолынан сыр тартып, еркін тақырыпта әңгімелесу үшін сөз Дауылбай ағайға беріледі.
(АРДАГЕР ҰСТАЗДАРМЕН СЫР-СҰХБАТ!)
Жүргізуші:
Бүгін бізде үлкен мереке. Бүгін ұстаздар қауымының төл мерекесі. Ұстаз - ұлағатты есім. Күн сәулесі өмірге қандай жарық берсе, ұстаз есімі де шәкірттерге күндей жарық береді. Бүгінде білім – өркениетті елдердің құнды капиталына, сенімді тірегіне айналуда, білім менеджментін дамыту мен үздіксіз білім алуды мақсат еткен, болашақтың құзіретті тұлғасын тәрбиелеудегі зор міндетті жүктеген ұлт ұстаздары Сіздерсіздер!
Еңбек етсем, ертеңгі- бақытыма сенемін,
Мақcатыма жеткізер- уақытыма сенемін,
Достық іспен қасты да- жеңеріме сенемін,
Ақыл, сана білім мен өнеріме сенемін.
Арым- таза, ақ көңіл- адалдыққа сенемін,
Абыройлы, ақ ниет- адамдыққа сенемін!
Жас ұрпақтың жарқын болашағына жұлдызды жол салатын, құзіретті тұлға — Сіздерсіздер!
Біздің ұжымымызда білім саласында жастарға үлгі болып, мектебімізге келген жас мамандарға ақылы мен ісімен тәлімгер болып жүрген ұстаздар бар.
Ендеше, осындай ұстаздарға мерекелік жылы лебізін білдіріп, «Жастардың үздік тәлімгері» номинациясымен марапаттап, құттықтау үшін сөз мектеп директорының оқу ісі жөніндегі орынбасары Елбосын Баян Ипбергенқызына беріледі.
(«ЖАСТАРДЫҢ ҮЗДІК ТӘЛІМГЕРІ» НОМИНАЦИЯСЫНЫҢ ИЕГЕРЛЕРІ МАРАПАТТАЛАДЫ)
Жүргізуші:
ӘН: Мектебімізден құралған жас бишілердің орындауында «Цыганка» биін тамашалаңыздар.
Жүргізуші:
Нұр жүзінен жылы шуақ төгілген
Шәкірттерін сүйген таза көңілден
Тағылым беріп жас ұрпаққа қашан да
Өз соқпағын тапқан мынау өмірден
Ізгілікті он бойына жинаған
Шәкірттерге жан жылуын сыйлаған
Тәрбиелеп жаңа адамын Отанның
Ардақтысы болған елдің мұғалім.
Біздің ұжымымызда білім саласында жас болсада, аянбай еңбек етіп, шығармашылықпен жұмыс жасасп жүрген жас мамандар жетерлік. Ендеше, жас мамандарға мерекелік жылы лебізін білдіріп, «Үздік жас маман» номинациясымен марапаттап, құттықтау үшін сөз мектеп директорының оқу ісі жөніндегі орынбасары Қалиева Жадыра Темірбекқызына беріледі.
(«ҮЗДІК ЖАС МАМАН» НОМИНАЦИЯСЫНЫҢ ИЕГЕРЛЕРІ МАРАПАТТАЛАДЫ)
ӘН: «Кел айым» әнін мектебіміздің музыка пәнінің мұғалімі Балымбетов Қасымның орындауында қабыл алыңыздар!
Жүргізуші:
Данышпан да, дана да оқып сенен,
Атақ-даңқын асырды бар әлемнен.
“Ұстаз” деген аяулы, асыл жанды,
Жақсы көрем, арнаймын жақсы өлең!
Ұстаз деген – жарық күні ғаламның,
Ұстаз деген – анасы ол адамның.
Бүкіл әлем мойындайды еңбегін,
Сен де одан адам болып жаралдың.
Ұстазыңды түсінген сен тереңнен,
Бар әлемге еңбегімен еленген.
Сенің бағың өрге қарай өрлесе,
Ол да бірге қуанышқа кенелген.
Жүргізуші:
Ұстаз — ұлағатты есім. Шәкірттеріңізді білім нәрімен сусындатып, тәлім тәрбие беру, жақсы қасиеттерді бойларына дарытып, адамгершілік рухта бағыт — бағдар беруде еңбектеріңіз зор. Олай болса, құрметті ардагер – ұстаздар, дендеріңізге саулық, отбасыларыңызға бақыт, мерейлеріңіз үстем болып, ұзақ ғұмыр кешіңіздер демекпіз.
Құрметті ардагерлер, ардақты ұстаздар!
«Ұрпаққа үлгі – әр ісің!» атты сыр-сұхбат, мерекелік салтанатты шарасы өз мәресіне жетті.
«Батаменен ел көгерер» (ардагерлерден бата алайық)
«ҰСТАЗЫМ» әні хормен айтылып қорытындыланатды.